Et geet drëm, hinnen e gesécherte Kader fir eng spilleresch Auszäit ze bidden. D’Kanner ginn zesumme mat hire Famillen opgeholl an op engem Stéck vun hirem Wee begleet, sief et no der Diagnos vun enger schwéierer Krankheet oder wärend der ganzer Krankheet, och wärend de Verschlëmmerungsphasen. D’Famille kënnen och nom Doud vum Kand betreit ginn. Esou eng Struktur, speziell fir Kanner a Jugendlecher an der Palliativfleeg, gëtt et schonn an eisen Nopeschlänner, zu Lëtzebuerg awer nach net.

D’Haus kéint Kanner am Alter vun 0 bis 27 Joer an hir Famillen entweeder daagsiwwer oder fir méi laang Openthalter ophuelen, an eng komplett Prise en charge vun deem kranke Kand sécherstellen. D’Famille géifen Ënnerstëtzung an alle Beräicher ugebuede kréien.

Eist Erhuelungshaus soll och eng Plaz si vun der Paus, vum Accueil, der Informatioun a Formatioun fir d’ganz Famill vun de kranke Kanner, fir d’Aidanten an d’Benevollen, genee ewéi fir déi interesséiert Gesondheetsdéngschtleeschter.